"Bəniz" ləqəbli tiktoker 10 il 3 ay həbs cəzası alıb

Hədə-qorxu ilə pul tələb etməkdə təqsirləndirilən "Bəniz" ləqəbli tiktoker Aybəniz Xəlilovanın cinayət işi üzrə məhkəmə prosesi başa çatıb. Bu barədə unikal məlumat yayıb.

Bakı Ağır Cinayətlər Məhkəməsində hakim Fəxri Məmmədovun sədrliyi ilə keçirilən iclasda hökm elan olunub. Hökmə əsasən, Aybəniz Xəlilova 10 il 3 ay müddətinə azadlıqdan məhrum edilib. Məhkəmə iclasında son sözlə çıxış edən Xəlilova özünü təqsirli bilmədiyini, ona qarşı irəli sürülən ittihamların əsassız olduğunu deyib.

Xatırladaq ki, dövlət ittihamçısı əvvəlki prosesdə onun 11 il müddətinə azadlıqdan məhrum edilməsini istəmişdi.

İttihama görə, Aybəniz Xəlilova Cinayət Məcəlləsinin 182.3.2-ci (külli miqdarda əmlak əldə etmək məqsədilə hədə-qorxu ilə tələb etmə) və 221.3-cü (xuliqanlıq) maddələri ilə təqsirləndirilib. Şikayətçinin ərizəsinə əsasən, tiktoker ondan hissə-hissə ümumilikdə 836 min manat tələb edib. Məlumata görə, tərəflər uzun müddət sevgili münasibətində olublar. Məhkəmə istintaqı zamanı isə zərərçəkmiş şəxs Aybəniz Xəlilovadan şikayətçi olmadığını bildirib.

Mənbə: anews.az