Rusiyalı deputat: Dağ ərazilərinin inkişafı üçün vahid yanaşma vacibdir
MDB məkanında dağ ərazilərinin inkişafı ilə bağlı vahid hüquqi yanaşmaların formalaşdırılması xüsusi əhəmiyyət daşıyır. Bunu Rusiya Federasiyası Federal Məclisinin Dövlət Dumasının Aqrar məsələlər komitəsinin üzvü, MDB Parlamentlərarası Assambleyasının aqrar siyasət, təbii ehtiyatlar və ekologiya üzrə daimi komissiyasının sədr müavini Aleksey Lavrinenko bildirib. Onun sözlərinə görə, hazırda region ölkələrində “dağ ərazisi” anlayışına dair müxtəlif hüquqi təriflər mövcuddur. Lavrinenko qeyd edib ki, Dağıstan Respublikasının 2010-cu il tarixli “Dağ əraziləri haqqında” qanununda və İnquşetiya Respublikasının 2016-cı il qanununda dağ əraziləri mürəkkəb relyefə malik, 25 kilometrlik radiusda 500 metr və daha yüksək yüksəklikdə yerləşən, eləcə də mütləq hündürlüyü 1000 metr və daha çox olan ərazilər kimi müəyyən edilir. O əlavə edib ki, Şimali Osetiya-Alaniya Respublikasının 2019-cu il qanunvericiliyində isə dağ əraziləri mürəkkəb relyef, sərt iqlim şəraiti, məhdud nəqliyyat əlçatanlığı və xüsusi təsərrüfat fəaliyyəti şərtləri ilə xarakterizə olunan ərazilər kimi qəbul edilir. Deputatın sözlərinə görə, dağ regionları yalnız ucqar yaşayış məntəqələri deyil, həm də mühüm strateji resurs hesab olunur. “Bu ərazilər ekoloji təmiz kənd təsərrüfatı, turizm, su və enerji ehtiyatları baxımından böyük potensiala malikdir. Eyni zamanda burada yaşayan əhalinin həyat keyfiyyətinin yüksəldilməsi və davamlı inkişafın təmin olunması əsas prioritetlərdən biridir”, - Lavrinenko bildirib. O vurğulayıb ki, MDB məkanında dağ ərazilərinin qorunması və inkişafı üzrə model qanunların hazırlanması dövlətlər arasında əməkdaşlığın gücləndirilməsinə xidmət edir. Gülnar Nazimqızı
Mənbə: anews.az
