İİB Qrupu çərçivəsində Azərbaycanla 5 yeni saziş imzalanıb
Bakıda keçirilən İslam İnkişaf Bankı (İİB) Qrupunun İllik Toplantısı çərçivəsində təşkil olunan Özəl Sektor Forumunun açılışında 5 yeni saziş imzalanıb.
Bu barədə İnvestisiyaların və İxrac Kreditlərinin Sığortalanması üzrə İslam Korporasiyasının (ICIEC) baş icraçı direktoru Xalid Xələfalla bildirib.
Onun sözlərinə görə, imzalanan sənədlər arasında enerji və bərpa olunan enerji sahələrində maliyyələşdirmə imkanlarının araşdırılması məqsədilə SOCAR ilə memorandum, AzerConnect ilə əməkdaşlıq sazişi, həmçinin Turan Banka 20 milyon ABŞ dolları məbləğində maliyyələşdirmə sazişi yer alıb.
Bundan əlavə, Türk İnvestisiya Fondu ilə Mərkəzi Asiya regionunda potensial investisiyaların maliyyələşdirilməsi üçün resursların səfərbər edilməsini nəzərdə tutan çərçivə sazişi, eləcə də Azərbaycan Biznesin İnkişafı Fondu ilə Azərbaycanda və regionda maliyyə resurslarının cəlb olunmasına yönəlmiş əməkdaşlıq sənədi imzalanıb.
ICD rəhbəri qeyd edib ki, İİB Qrupu uzun illərdir Azərbaycanla sıx əməkdaşlıq edir. Onun sözlərinə görə, ICD ölkədə fəaliyyət göstərən bir sıra bankları maliyyə xətləri vasitəsilə dəstəkləyib, həmçinin kiçik və orta sahibkarlığın maliyyələşdirilməsini genişləndirmək məqsədilə lizinq şirkətləri ilə əməkdaşlıq edib.
O bildirib ki, İİB Qrupunun sığorta qurumu olan İslam İnvestisiya və İxrac Kreditlərinin Sığortalanması Korporasiyası (ICIEC) Azərbaycanın 2023-cü ildə təşkilata 49-cu üzv kimi qoşulmasından sonra ölkədə ümumilikdə 164 milyon dollar həcmində əməliyyatı sığortalayıb.
Rəhbərin sözlərinə görə, son dövrlərdə telekommunikasiya sektorunda həyata keçirilən layihələrin sığortalanması istiqamətində mühüm əməliyyatlar reallaşdırılıb. O əlavə edib ki, təşkilat gələcəkdə nəqliyyat və digər infrastruktur layihələrinin dəstəklənməsində maraqlıdır.
ICD rəsmisi vurğulayıb ki, qurum daha əvvəl Qazaxıstandan Azərbaycan Dəmir Yollarına lokomotiv ixracının maliyyələşdirilməsi layihəsini də dəstəkləyib və Azərbaycanla əməkdaşlığın gələcəkdə daha da genişləndirilməsi üçün böyük potensial mövcuddur.
Aytac Zeynalova
Mənbə: anews.az
