Maduro Nyu-Yorkda məhkəmə qarşısına çıxarılacaq
ABŞ qüvvələri tərəfindən saxlanılan Venesuela Prezidenti **Nikolás Maduro**ya qarşı rəsmi ittihamların təqdimatı yanvarın 5-də Nyu-York məhkəməsində keçiriləcək. Bu barədə The Washington Post məlumatlı mənbəyə istinadən yazır.
Məlumata görə, dinləmə Aşağı Manhettendə yerləşən federal dairə məhkəməsində yerli vaxtla günorta saatlarında (Bakı vaxtı ilə 21:00) keçiriləcək.
İşə federal hakim Alvin Hellerstein baxacaq.
ABŞ hakimiyyəti Maduronu uzun illərdir narkotik qaçaqmalçılığı, terror təşkilatları ilə əməkdaşlıq və ABŞ-a qarşı cinayət fəaliyyəti ittihamları ilə axtarışda saxlayır.
Vaşinqton Maduronun legitimliyini tanımadığını bəyan edib və Venesuelaya qarşı sanksiyalar tətbiq edib. Karakas isə ittihamları siyasi motivli adlandırır.
N.Təbrizli
