Səhiyyə Nazirliyi lisenziyasız kosmetoloqla bağlı Baş Prokurorluğa müraciət edib

Səhiyyə Nazirliyi lisenziya olmadan kosmetoloji fəaliyyət göstərdiyi müəyyən edilən fərdi sahibkar Elnarə Canlı ilə bağlı Baş Prokurorluğa müraciət edib. Bu barədə Səhiyyə Nazirliyinin Analitik Ekspertiza Mərkəzi (AEM) məlumat yayıb.

Məlumata görə, Elnarə Canlının fəaliyyəti ilə bağlı vətəndaş müraciətləri və mediada yayılan məlumatlar əsasında AEM tərəfindən bir neçə dəfə araşdırma və plandankənar yoxlama keçirilib.

İlk yoxlama 8 may 2025-ci ildə Bakı şəhərinin Yasamal rayonunda aparılıb. Yoxlama zamanı sahibkarın lisenziya tələb olunan özəl tibb fəaliyyəti, o cümlədən kosmetoloji xidmətləri müvafiq lisenziya olmadan göstərdiyi müəyyən edilib.

Bununla əlaqədar İnzibati Xətalar Məcəlləsinin 210.1-ci maddəsi ilə inzibati xəta haqqında protokol tərtib edilərək baxılması üçün aidiyyəti üzrə göndərilib.

AEM daha sonra 22 dekabr 2025-ci il və 20 fevral 2026-cı ildə həmin şəxsin fəaliyyəti ilə bağlı daha iki plandankənar yoxlama keçirib. Hər iki yoxlama zamanı inzibati məsuliyyət yaradan pozuntular müəyyən edilib və yeni protokollar tərtib olunub.

Mərkəzin məlumatına görə, görülən inzibati tədbirlərə baxmayaraq, Elnarə Canlının lisenziya olmadan kosmetoloji fəaliyyətini davam etdirdiyi müəyyən edilib.

Bununla əlaqədar Səhiyyə Nazirliyi onun fəaliyyətinin dayandırılması istiqamətində əlavə hüquqi tədbirlərin görülməsi üçün 13 mart 2026-cı ildə Baş Prokurorluğa müraciət edib.

Mənbə: anews.az