Qrenlandiya buzlarında nəhəng viruslar aşkar edilib

Danimarkanın Orxus Universitetinin alimləri Qrenlandiyanın buz örtüyündə nəhəng viruslar aşkar ediblər ki, bu viruslar buzların əriməsini yavaşlada bilir.

BAKU.WS xəbər verir ki, araşdırmanın nəticələri "Microbiome" jurnalında dərc olunub.

Mütəxəssislərin fikrincə, viruslar qar yosunları ilə qidalanır və yosunların çiçəklənməsini təbii olaraq nəzarət altında saxlamaqda rol oynaya bilər. Yosunların artması buzun günəş işığını əks etdirmək qabiliyyətini azaldır və səthi əriməni gücləndirir, lakin viruslar bu prosesin qarşısını ala bilər.

Alimlər hələ virus hissəciklərini birbaşa müşahidə etməsələr də, qaranlıq buz, qırmızı qar (piqmentli yosunlarla rənglənmiş) və ərimə çuxurları (kriokonitlər) nümunələrini analiz edərək virus DNT-sini aşkarlayıblar. Sübut olunub ki, DNT canlı və aktiv viruslardan qaynaqlanır.

Adətən virusların ölçüsü 20-200 nanometr, tipik bakteriyanın ölçüsü isə 2-3 mikrometr olur. Lakin nəhəng viruslar ilk dəfə 1981-ci ildə okeanda aşkar edilib və 2,5 mikrometrə qədər böyüyərək əksər bakteriyalardan daha böyük ölçüyə malikdir. Bu viruslar müxtəlif mühitlərdə, o cümlədən torpaq və hətta insan orqanizmində yaşayırlar, lakin buz səthində ilk dəfə tapılıblar.

Mənbə: baku.ws