Türkiyəyə qızmar istilər gəlir: Temperatur 45 dərəcəyə çatacaq

Türkiyənin Mərmərə, Egey, Aralıq dənizi, İç Anadolu və Qərbi Qara dəniz bölgələrində havanın temperaturu mövsümi normadan 8-12 dərəcə yuxarı, digər bölgələrdə 4-8 dərəcə isti olacaq. Həftənin sonuna qədər Antalyada temperaturun 37-45 dərəcə olacağı təxmin edilir.

BAKU.WS TRT Haber-ə istinadən xəbər verir ki, Türkiyənin Meteorologiya Ümumi Müdirliyinin Təhlil və Proqnozlar şöbəsinin müdiri Şahin Şahbaz yüksələn temperaturlarla bağlı qiymətləndirmələr edib.

Mütəxəssis bildirib ki, keçən həftədən bəri təsirli olan yağışlı hava Şərqi Anadolu Bölgəsində müşahidə olunduqdan sonra Türkiyəni tərk edəcək və yerini isti havalara verəcək.

“Bu gündən etibarən gələn həftənin sonuna qədər hava az buludlu, açıq və isti olacaq. Mərmərə, Egey, Aralıq dənizi, İç Anadolu və Qərbi Qara dəniz bölgələrinin daxili seqmentlərində sürətli artımla temperaturun mövsüm normalarından 8-12 dərəcə yuxarı qalxacağını gözləyirik. Ölkənin qalan hissəsində havanın temperaturu mövsümi normadan 4-8 dərəcə yuxarı qalxacaq və bunun həftə sonuna qədər də belə davam edəcəyini gözləyirik”.

Şahbaz bildirib ki, bu həftə müşahidə olunacaq temperaturlar "Afrika istiləri" olaraq xarakterizə edilənlər arasında deyil.

Ankara, İstanbul və İzmirdə 3 gün ərzində yağış yağmayacaq. Ankarada havanın temperaturu mövsüm normalarından 8-9 dərəcə yüksək olacaq.

İstanbulda bu gün havanın temperaturu 32, çərşənbə və cümə axşamı isə 34 dərəcə olacaq. Havanın temperaturu mövsüm normalarından 9-10 dərəcə yuxarı qalxacaq, bəzi bölgələrdə istilər daha da arta bilər.

İzmirdə isə temperatur bu gün 38 dərəcəyə, çərşənbə və cümə axşamı isə 40 dərəcəyə yüksələcək.

Mənbə: baku.ws