Nazirlikdən restoran sahiblərinə çağırış: təmizləyici qurğuların normalara uyğunluğunu təmin edin

Ekologiya və Təbii Sərvətlər Nazirliyi (ETSN) ictimai-iaşə obyektlərinin sahiblərinə çağırış edib.

Bu barədə BAKU.WS-ə nazirliyin mətbuat katibi İradə İbrahimova məlumat verib.

"Ölkə ərazisində fəaliyyət göstərən restoran və ictimai-iaşə obyektlərinin sahiblərinə çağırış edirik ki, Məhərrəm ayında toyların olmaması fürsətindən yararlanaraq və bunu bir imkan kimi dəyərləndirərək, obyektlərindəki təmizləyici qurğuların texniki göstəricilərinin normalara uyğunluğunu təmin etsinlər, filtrləri vaxtında dəyişsinlər, havaya normadan artıq tullantı atılmasına yol verməsinlər", - o qeyd edib.

İ.İbrahimova qeyd edib ki, bir sıra restoran və ictimai-iaşə obyektlərində təmizləyici qurğuların quraşdırılmasına baxmayaraq, təəssüf ki, onlara vaxtaşırı xidmət göstərilmir, filtrləri vaxtında dəyişdirilmir və nəticədə havaya normadan artıq tullantı atılır:

“Bir daha iaşə obyektlərinin sahiblərindən tələbimiz odur ki, təmizləyici qurğuların texniki göstəricilərinin normalara uyğunluğunu yoxlasınlar".

Mənbə: baku.ws