Azərbaycan və Gürcüstan hərbi-dəniz qüvvələri əməkdaşlığı genişləndirməyi müzakirə edib
Azərbaycan və Gürcüstan hərbi-dəniz qüvvələri arasında əməkdaşlığın genişləndirilməsi və təcrübə mübadiləsinin inkişaf etdirilməsi müzakirə olunub, Azərbaycan Müdafiə Nazirliyi bildirib.
Müzakirələr Gürcüstan Müdafiə Qüvvələrinin komandanı general-leytenant Giorgi Matiaşvilinin Azərbaycana səfəri çərçivəsində keçirilib.
Azərbaycan Ordusunun Baş Qərargah rəisi general-polkovnik Kərim Vəliyev və Gürcüstan nümayəndə heyəti Hərbi Dəniz Qüvvələrinin hərbi hissələrindən birində olublar.
Hərbi Dəniz Qüvvələrinin komandanı kontr-admiral Şahin Məmmədov qonaqlara qüvvələrin fəaliyyəti və aparılan islahatlar barədə məlumat verib. Nümayəndə heyəti hərbi-texniki vasitələrin sərgisi və dəniz xüsusi təyinatlılarının nümayiş məşğələsi ilə tanış olub.
Səfər çərçivəsində Gürcüstan nümayəndə heyəti Cəmşid Naxçıvanski adına Hərbi Liseyi də ziyarət edib. Qonaqlara Milli Müdafiə Universiteti və liseydə təhsil prosesinin təşkili barədə məlumat verilib.
Mənbə: anews.az